Baka Nga Mamaya Okay Na Ulit.

Baka nga mamaya okay na ulit.

Kahapon bago ka matulog ang dami mong iniisip na mga bagay.

Mga kinakatakutan na paano kung hindi mangyari o masunod ang mga pinaplano mo, paano mo haharapin yung ganoong klaseng riyalidad o sitwasyon. Mga bagay na gusto mong tapusin, aralin, simulan, at intindihin.

Natulog ka lang. Gumising ka lang.

Tapos ayan na pakiramdam mo talo ka na. Hindi pa tumitilaok yung manok, wala ka pang naisa-sawsaw na pandesal sa kape, talo ka na. Gumising ka na lang na walang paki sa kung anong mangyayari, ayaw mo na din tapusin, aralin, simulan, at intindihin.

Ang gusto mo na lang humiga tapos subukan pigilan ang paghinga at umasa na eto na tapos na. Pero hindi mumulat at mumulat pa din ang mga mata mo, hahabulin mo pa din ang pag hinga mo. Babangon, hihingang malalim at susubukan hanapin kung nasaan yung kung anong kapiranggot na buhay sa mata mo.

Biruin mo yon. Araw araw mong bibiruin ang sarili mo. Sasabihin mo na kaya mo kahit sa kaloob-looban mo ayaw mo na bumangon. Biruin ang sarili na baka mamaya lumitaw ulit ang sarili, baka mamaya okay ka na ulit.